Baş katib Mehmet Süreyya Er 4-5 may 2023-cü il tarixlərində Ankarada Türkiyə Böyük Millət Məclisinin ev sahibliyində keçirilən Qara Dəniz İqtisadi Əməkdaşlıq Təşkilatı Parlament Assambleyasının (QDİƏTPA) 61-ci plenar iclasında müşahidəçi qismində iştirak etmişdir.
Plenar iclas QDİƏTPA-nın üzv ölkələrinin parlament nümayəndə heyətləri, eləcə də müşahidəçi və qonaq qismində nümayəndə heyətlərini bir araya gətirmişdir.
Açılış mərasimində QDİƏTPA-nın prezidenti, Türkiyə Böyük Millət Məclisinin spikeri Mustafa Şentop və QDİƏTPA-nın Baş katibi Asəf Hacıyev çıxış etmişdir.
İclasda, həmçinin Baş katib Mehmet Süreyya Er də çıxış etmişdir.
Gündəliyə QDİƏTPA-nın komitələrinin hesabat məruzələri və tövsiyə qərarlarının qəbulu, o cümlədən QDİƏTPA, onun aidiyyəti qurumları və sektor dialoqu üzrə tərəfdaşlarının fəaliyyəti haqqında məlumatların təqdimatı daxil edilmişdir.
Hesabat və 60-cı plenar iclasın protokolu, həmçinin Assambleyanın Azərbaycan, Bolqarıstan, Rumıniya, Türkiyə və Ukraynadan olan yeni üzvlərinin etimadnamələri təsdiq edilmişdir.
Assambleya Qoşulmama Hərəkatı Parlament Şəbəkəsinə QDİƏTPA-da müşahidəçi statusunun verilməsi barədə qərar qəbul etmişdir.
QDİƏTPA-da sədrlik Ukrayna Ali Radasına təhvil verilmişdir.