İqtisadi əməkdaşlıq komissiyası Türk Dövlətləri Parlament Assambleyasının (TÜRKPA) dörd daimi komissiyasından biridir. Komissiyanın gündəliyinə üzv dövlətlər arasında iqtisadiyyat, ticarət, maliyyə, nəqliyyat, tranzit və s. sahələrdə əməkdaşlıq məsələləri daxildir.

Komissiya, ilkin olaraq "İqtisadi, ticarət və maliyyə məsələləri" komissiyası olaraq yaradılıb. 2014-cü ildə TÜRKPA-nın Bakıda keçirilən 5-ci plenar iclası çərçivəsində Assambleya Şurasının iclası zamanı üzv dövlətlər arasında iqtisadi əməkdaşlıqla bağlı bütün məsələlərin əhatə edilməsi məqsədilə komissiyanın adı "İqtisadi əməkdaşlıq komissiyası" olaraq dəyişdirilib.

TÜRKPA-nın daimi komissiyalarının hər biri hər üzv dövlətdən iki parlament üzvü olmaqla səkkiz üzvdən ibarətdir. Daimi komissiyaların sədrləri və sədr müavinləri TÜRKPA-nın plenar iclaslarında üç il müddətinə seçilir.

Daimi komissiyalar öz əməkdaşlıq sahələri çərçivəsinə daxil olan məsələləri nəzərdən keçirir və plenar iclaslara təqdim olunan sənədləri hesabat məruzələri və tövsiyə qərarları şəklində hazırlayır. Eyni zamanda, komissiyalar üzv dövlətlərin milli qanunvericiliyinin uyğunlaşdırılması və yaxınlaşdırılması prosesini asanlaşdırmaq məqsədilə qarşılıqlı maraq doğuran məsələlər üzrə model qanun layihələrinin hazırlanması üzərində iş aparırlar.